Chinar Hotel & Spa

Chinar Hotel & Spa təmiz havası və əlverişli ekoloji mühiti ilə seçilən geniş park ərazisində yerləşir. Beşulduzlu yerləşmə şəraiti, ən müasir tibbi avadanlıqlar, ixtisaslı həkim komandası və təbii müalicəvi Naftalan neftinin şəfaverici xüsusiyyətləri hoteli kurortun aparıcı müalicə və sağlamlıq mərkəzlərindən birinə çevirir.

Chinar Hotel & Spa SPA və tibb mərkəzlərinin fəaliyyəti üzrə Avropa standartlarına uyğunluğu təsdiqləyən beynəlxalq EuropeSpa sertifikatına malikdir.

Hotelin bütün otaqları rahat və genişdir. Otaqlar keyfiyyət və təchizat baxımından beşulduzlu hotel standartlarına tam uyğundur. Hər bir otaqda iqlimə nəzarət sistemi və balkon mövcuddur.

Hotel həm böyüklərin, həm də uşaqların asudə vaxtının səmərəli təşkili üçün geniş imkanlar təqdim edir. Burada kitabxana, stolüstü oyunlar otağı və uşaq meydançası fəaliyyət göstərir. Əlilliyi olan qonaqların rahatlığı üçün uyğun şərait yaradılıb. Qonaqlar hotelin avtomobil dayanacağından ödənişsiz istifadə edə bilərlər.

Müasir tibb mərkəzində qonaqlara kurortun əsas müalicə proseduru sayılan Naftalan vannaları da daxil olmaqla müxtəlif müalicə və sağlamlıq prosedurları təqdim olunur.

Hotelin restoranında geniş çeşidli yeməklər açıq bufet formatında təqdim edilir və menyu hər gün yenilənir. Menyuda sağlam qidalanmaya üstünlük verən qonaqlar üçün pəhriz yeməkləri də xüsusi yer tutur.

Əsas üstünlüklər

• Gəncə Beynəlxalq Hava Limanından ödənişsiz transfer
• 25 × 12 metr ölçülü geniş qapalı hovuz
• Təbii müalicəvi Naftalan nefti
• Geniş xəstəlik spektri üzrə müalicə imkanları
• 200 avtomobil üçün ödənişsiz dayanacaq
• Hotelin bağında unikal heykəllər kolleksiyası
• Əlilliyi olan qonaqların istirahət və müalicəsi üçün uyğunlaşdırılmış komfortlu şərait